Adının Koreya dilindən tərcüməsi “gözəl, sakit göl” anlamı verən Kumho şirkəti 1950-1953-cü illərdəki Koreya-ABŞ müharibəsindən sonra Pak İnçxon adlı biznesmen tərəfindən Samyang Tire adı ilə Kvandju şəhərində təsis olunub. İlk dövrlərdə şirkət gün ərzində cəmi 20 şin istehsal edirdi.

Şirkətin sürətli inkişafı 1950-53-cü illərdəki Koreya müharibəsindən sonra daxili avtoparkın sürətlə artması və müvafiq olaraq şin təchizatına tələbatın artması ilə başladı. 5 il sonra Kumho Tire xarici bazara çıxdı və ilk ixracatını 7700 USD dəyərində olmaqla Tailanda göndərdi.

1963-cü ildə şirkət Koreya təkər istehsalçıları arasında ilk dəfə olaraq minik avtomobilləri üçün şinlərin istehsalına start verir.

1975-ci ildə isə təyyarələr üçün radial təkərlərin hazırlığına başlanılır. 1 il sonra isə Kumho Tire Koreya sənayesində rekorda imza atır: il ərzində 1 000 000 ədəd şin istehsal olunur.

1980-ci ildə Kumho Tires şirkəti “General Motors”un avtomobillərinin şin təchizatçısı kimi sertifikatlaşır. İllik istehsal həcmi 20 milyon ədəd şinə, ixracdan gəlir isə 100 000 000 dollara çatır.

1992-ci ildən Kumho dünyanın təkər istehsalçılarının ilk 10-na düşən markaya çevrilir.

Kumho Tires şirkəti idman sahəsi ilə çox yaxından bağlıdır. 1993-cü ildə Paris – Dakar rallisində iştirak edən şirkət 2007-ci ildə Manchester United futbol klubunun, 2014-cü ildə isə basketbol yarışları üzrə turnirin (NBA) sponsoru olur.

İlk 10-da qərarlaşan şirkətin Cənubi Amerikada, Yaponiyada, Avropada və Cənubi Koreyada mövcud olan 300 sınaq qurğuları və daimi təkmilləşdirmə işləri şirkətə daim bu mövqeyini qorumağa imkan verir. Koreyadakı iki zavodda il ərzində 36 milyon şinin istehsal edilməsi Kumho-nun nə qədər populyar olmasından xəbər verir. Kumho Tires bugün avtomobillər, təyyarələr, avtobuslar, kənd təsərrüfat texnologiyası və sənaye texnologiyası, habelə idman avtomobiləri üçün şinlər istehsal edir.